Македонски
„Владимир ни е другар. Можеби сега во поинаква форма, но и понатаму е присутен со своите чекори, тонови, букви и линии. Изложбата ја почнавме заедно, а тој ја заврши со својот последен цртеж, автопортрет. Неговото заминување го смени и нејзиното значење. На моменти се прашувавме дали има смисла да продолжиме. Со текот на времето, самиот процес се претвори во начин да се соочиме со загубата и повторно да бидеме со него низ работите што ги остави зад себе.“
„Со почит“ отвора мал дел од архивата на Владимир Муратовски Диво (1969 – 2026). Фрагменти од цртежи, музика, текстови, изданија и други траги од неговата долгогодишна работа се собираат и поврзуваат, отворајќи простор за нивно повторно гледање, слушање, читање и доживување. Поезијата, музиката и цртежот кај Диво се различни форми на еден ист импулс, препознатлив по минимализмот, повторувањето, директноста и специфичниот хумор. Изложбата произлегува од неговата долгогодишна поврзаност со Партизанска штампа, Стотројка и скопската културна сцена.
Во рамките на изложбата ќе биде промовирана уметничка книга во сито-печат, посветена на неговите цртежи „карикатури“, а ќе биде претставена и компилацијата „Elektro Kultura – Various Astronauts“, достапна на CD и касета, со 15 верзии на песната „Астронаут“ од локални и странски музичари.
„Со почит“ не е само наслов, туку и начинот на кој пристапуваме кон неговото дело. Не се обидуваме да направиме конечен портрет на Владимир Муратовски Диво, туку да ја отвориме неговата архива како процес на откривање, сеќавање и истражување. Можеби немаме доволно зборови да ја опишеме празнината што ја чувствуваме поради неговото отсуство, но тој ни остави премногу страст и ентузијазам. Нема каде да бегаме. Продолжуваме да чуваме и создаваме.
Изложбата се реализира со финансиска поддршка од Центарот за современи уметности – Скопје, Министерството за култура и туризам на РСМ и Општина Центар.
