Македонски
Кај Велибор дома имам одено заедно со Палчо, па после и на слава и последниот пат за случајот со Панче. Бев и таа вечер но дата не памтам, го продолжи исказот Влатко Кешишев.
Го опиша и ранецот на Палевски како темно син и оти стално си го носел со себе, но оти не знае што има во нето.
Ранецот заедно со кесата „мотороли“ го однесов во гаражата, се присети Кешишев.
Адвокатот Ефремов го праша што разговарале таа вечер.
Разговаравме за Панче, каде живее и како да се пријде до него, одговори Кешишев.
Прв неуспешен обид и потоа грабнување
Земаа „мотороли“ тројцата и тргнаа кон куќата на Панче. Јас го земав „кангуто“ и чекав долу под патот. Целта беше возилото и оти живее сам и нема никој да го бара и возилото да се искористи за друга намена. Чекав во возилото околу 40 минути. Се вратија и рекоа дека ништо не направиле. Кога по неколку дена обидот беше успешен јас го возев „цитроенот“, а го видов Палевски како попат го фрли мобилнниот на Панче. Јас во нити еден момент не го видов Панче бидејќи беше во гепек. Во штабот кога стигнавме во Скопје ми кажаа дека е убиен и фрлен во дупката, откри Кешишев..
За грабнувањето во Скопје
Кешишев раскажа дека целта на грабнување било уцена за пари но оти појма немал за кого се работи. Не знаел ни за која сума се работи.
Јас немав право на збор, Палчо ми рече да молчам. Сите договори беа меѓу него и Велибор. Тоа утро со „кангуто“ дојдовме до Радишани каде што беше „цитроенот“. Палчо не остави и ние тргнавме по него до зградата и паркиравме до паркингот. Ми кажаа да седам во колата и да не ја гаснам и тие влегоа во зградата. Ми дадоа „моторола“ и по 10 минути ми кажаа да препаркирам и отворам гепекот. Боре носеше нешто во вреќата. Тргнавме кон местото, возеше Велибор, јас до него, а одзади Боре. Палчо беше напред. Попат не разговаравме кој е во вреќата се додека не стигнавме. Кога стигнавме сите излеговме и Палчо ми рече да одам околу 20 метри да внимавам да не наиде некој. Гепекот беше отворен а јас стоев отстрана и кога се свртев Палчо држеше пиштол. Слушнав истрел, но тап. Ме викнаа да го затрупаме телото. Покривме за кратко со стари работи за да изгледа како буниште. Палчо тогаш ги избриша лопатите и копачот со ВД-40 и ги стави во кангуто во кој влеговме јас и Боре а Палчо возеше. Дојдовме до селото Бразда и ми кажа да ги фрлам лопатите покрај патот. Ги фрлил и продолживме до местото каде што подоцна беше запален „цитроенот“, раскажа обвинетиот Кешишев.
По убиството се вратиле во седиштето на партијата и тогаш на Фејсбук видел дека се бара дете.
Му ја покажав сликата на Палчо и го прашав: „Што е ова“. Не ми одговори ништо.
Тој додаде дека слушнал оти пиштолот е на Боре но не може да потврди.
Пиштолот и моторолите беа во ранецот, а ранецот беше секогаш беше со Палчо.
