Македонски
Македонската амбасада во Белград ја потврдила информацијата за сообраќајната несреќа што се случила рано изутрината на автопатот Нови Сад – Суботица во Србија во која еден македонски државјанин загина, а еден е тешко повреден. Од Амбасадата се во контакт со семејството на починатото лице со цел олеснување на административните постапки за транспорт во земјава.
– Ве информираме дека до Амбасадата на Република Македонија во Белград е доставена информација за сообраќајна незгода што се случила во близина на Суботица, во која животот го загубил македонски државјанин, роден во 1986 година. Во незгодата е повредено уште едно лице, исто така македонски државјанин, кое со тешки повреди е хоспитализирано на одделението за реанимација во клиничкиот центар, информираат попладнево од македонското Министерство за надворешни работи и надворешна трговија.
Утрово, РТС објави дека македонски државјанин загина, а еден е тешко повреден во сообраќајна несреќа што се случила рано изутрината на автопатот Нови Сад – Суботица во Србија.
Според информациите добиени од Полициската управа на Суботица, возило „КИА“ со македонски регистарски таблички, кое се движело по автопатот кон граничниот премин Хоргош, излетало од патот на нива кај населбата Вишњевац, помеѓу клучката Жедничка и наплатната станица во Суботица, а потоа се превртело.
Во несреќата загинал патникот Н. А. (39), додека возачот А. А. (60) е тешко повреден и пренесен во болница во Суботица.
Сообраќајната полиција и обвинител од Основното јавно обвинителство во Суботица извршиле увид на местото на настанот.
Полицијата во Суботица соопшти дека против возачот ќе биде поднесена кривична пријава за тешко дело против безбедноста на јавниот превоз.
