Македонски
Од Република Турција се обезбедени 500.000 дози вакцина против сипаници кај овците како донација, кои се очекува да пристигнат деновиве, а до Европската комисија е доставено барање за дополнителни количества – соопшти Министерството за земјоделство, шумарство и водостопанство (МЗШВ) по денешната прес-конференција на Сојузот на одгледувачите на овци и упатениот апел за преземање итни мерки против ширењето на болеста.
МЗШВ информира и дека повторно е побарана и стручна поддршка од тимот EUVET на Европската комисија. Пред примената вакцините задолжително ќе бидат лабораториски испитани за безбедност и чистота, а вакцинирањето ќе почне по потврдувањето на резултатите, според официјален план и под контрола на Агенцијата за храна и ветеринарство (АХВ).
Воедно, ги предупреди сточарите дека самостојното набавување и применување вакцина на сопствен трошок и без претходно одобрение од АХВ, ќе биде санкционирано во согласност со важечките прописи.
– Во таков случај сопственикот нема да има право на компензација за заболените животни, ниту на обесштетување за животните одземени за сузбивање и искоренување на болеста. Неконтролираната примена на вакцини може да го отежни епидемиолошкото следење, да ја намали ефикасноста на преземените мерки и да создаде дополнителен ризик за стадата. Поради тоа, вакцинирањето може да го вршат единствено овластени ветеринарни служби според официјален план и под непосреден надзор на АХВ, -наведува МЗШВ.
Според МЗШВ, експертската група при АХВ редовно се состанува, ја разгледува епидемиолошката слика и ги утврдува понатамошните мерки за ограничување на болеста.
– Во координација со Агенцијата за храна и ветеринарство (АХВ) континуирано ја следиме епидемиолошката состојба. Министерот Борче Серафимовски и директорот на АХВ, Оливер Миланов, се во постојана и непосредна координација, а надлежните служби секојдневно ги анализираат податоците од засегнатите региони, ефектите од спроведените мерки и потребата од дополнително постапување. Системот за рано откривање и сузбивање на болеста се спроведува преку ветеринарните друштва со кои АХВ има склучено договори за извршување активности од јавен интерес. По секоја пријава за сомнителен случај, официјалните ветеринари земаат крв и брисеви од животните и ги доставуваат на лабораториско испитување. Доколку се потврди присуство на вирусот, директорот на АХВ донесува решение со кое се определуваат контролните и заштитните мерки во засегнатата одгледувачница, вклучително и евтаназија на животните и нивно нештетно отстранување со закопување на одобрена локација – наведува Министерството.
Одгледувачите денеска на прес-конференција пред Владата уште еднаш алармираа за состојбата со сипаниците кај овците и побараа итна вакцинација, како и повисоко обесштетување.
