Македонски
Хрватскиот претседател Зоран Милановиќ денеска изрази надеж дека Европската Унија нема да пропадне поради наметнување на едноумие, како што тоа им се случи на Југославија и Советскиот Сојуз.
Милановиќ е во дводневна посета на Словачка, каде што утре ќе се сретне со словачкиот колега Петер Пелегрини и со премиерот Роберт Фицо.
На состанокот со претставниците на хрватското национално малцинство во хрватската амбасада во Братислава, Милановиќ рече дека Пелегрини и Фицо ги познава долго време, комуницира со нив и дека е нивен истомисленик, „што не значи дека денес во Европа сите мислат исто“.
– Но, постои една тенденција луѓето да се наговараат, а ако не оди убаво, многу брзо се откажуваат од тоа, па потоа се оди на сила за сите да мислат исто, а тој филм веќе го гледавме. Поради тоа пропаднаа Југославија и Советскиот Сојуз. Се надевам дека нема и Европската Унија, рече Милановиќ.
– Не можат сите да се однесуваат на ист начин, а заедничките демократски вредности се прашање на толкување, додаде тој.
Се очекува Милановиќ утре со Пелегрини да разговара за билатералните односи, економската соработка, проширувањето на Европската Унија, европската одбрана и безбедност, енергетската соработка, како и за војните во Украина и на Блискиот Исток.
Кабинетот на претседателот во соопштението односите меѓу двете земји ги опиша како „пријателски, стабилни и без отворени прашања“.
Размената на стоки во 2024 година изнесувала 1,5 милијарди евра, а во првите единаесет месеци од оваа година Хрватска ја посетиле 528 илјади словачки туристи, се наведува во соопштението.
