Македонски
Морнарицата на Соединетите Американски Држави спроведе ненајавена проба на балистичка ракета „Тридент-II Д5“ во близина на Карибите, предизвикувајќи изненадување кај Порториканците кои беа сведоци на чуден светлосен феномен на небото. Тестот подоцна беше официјално потврден од морнарицата на САД.
Видеата од лансирањето, објавени од Ада Монсон од WAPA-TV во Сан Хуан, брзо се појавија на социјалните мрежи. Порториканците го опишаа впечатливиот сјај на ракетата, кој е резултат на јонизација на молекулите во горната атмосфера.
Експертот Марко Лангброек потврди дека станува збор за тест на ракетата„Тридент-II Д5“.
Тој рече дека објавените навигациски предупредувања јасно ја покажуваат областа на лансирање и траекторијата на ракетата, која е испукана од подморница на координати 28,5667, -76,4833.„Тридент-II Д5“ е во арсеналот на морнариците на САД и Велика Британија и е клучен елемент на стратегијата за нуклеарно одвраќање.
Американската морнарица подоцна објави дека вкупно четири невооружени ракети „Тридент-II Д5“ биле испукани од балистичка подморница од класата Охајо помеѓу 17 и 21 септември. Едно од лансирањата, кое се случи во недела навечер, било видливо од Порторико.
„Тест лансирањата се спроведуваат редовно за да се процени и обезбеди сигурноста и точноста на системот. Тие не биле поврзани со никаков тековен светски настан“, се вели во соопштението на морнарицата.
Вицеадмиралот Џони Р. Волф, директор на Програмата за стратешки системи на американската морнарица, рече дека лансирањата ја потврдуваат веродостојноста и сигурноста на американските нуклеарни капацитети за одвраќање.
„Нашиот систем за балистички ракети лансирани од подморница е од суштинско значење за националната безбедност уште од 1960-тите, а овие тестови продолжуваат да ја потврдуваат нашата подготвеност и сигурност“, рече Волф.
Тој додаде дека одржувањето на сегашните капацитети и развојот на следната генерација стратешко оружје се во срцето на мисијата на неговата команда.
