Македонски
По успешната скопска промоција, визуелниот уметник Зоран Кардула ја носи својата изложба „Flora Imaginarium“ во Крушево, во еден од највпечатливите културни споменици во Македонија – Македониумот. Изложбата ќе биде дел од годинешната манифестација „Десет дена Крушевска Република“.
„Flora Imaginarium“ претставува визуелен омаж на имагинарниот свет на растителни форми и органски структури, инспириран од македонската традиција, симболика и визуелни кодови, а произлезен од долгогодишна соработка со еден познат македонски бренд. Кардула ја работел оваа серија изминативе две години, градејќи уникатен визуелен јазик кој ја поврзува природата со модерната естетика.
„Изложбата е резултат на интензивна уметничка и дизајнерска работа, но и на длабоко размислување за тоа што значи македонскиот визуелен идентитет денес. Чест ми е што токму Македониумот – простор натоварен со историја, симболика и борба – ќе биде новиот дом на Flora Imaginarium“, вели Кардула.
Поставката ќе биде отворена во рамки на свеченостите за одбележување на Крушевската Република, и ќе биде достапна за посетителите во текот на целата манифестација.
„Се гледаме на 4 август во 20:30 часот и се надевам ќе уживате“, вели Кардула во објавата на социјални мрежи.
