Македонски
Градоначалничката на Лос Анџелес, Карен Бас, изјави дека Националната гарда не е распоредена во градот, демантирајќи ги шпекулациите за нејзино присуство.
Во објава на социјалната мрежа Икс, Бас им се заблагодари на полицијата на Лос Анџелес (LAPD) и локалните безбедносни сили за нивната работа, истовремено критикувајќи ги рациите на Имиграциската и царинска служба (ICE) и пријавеното насилство за време на протестите против нив.
Сепак, останува нејасно дали Националната гарда е распоредена во поширокиот регион на Лос Анџелес.
Во петокот, по рациите на ICE во градот, вклучително во областите Вестлејк и Јужен Лос Анџелес, беа уапсени 118 лица, од кои 44 само во петокот, според Си-Би-Ес. Гувернерот на Калифорнија, Гевин Њусом, ги осуди рациите, нарекувајќи ги „сурови“.
Федералната зграда во центарот на Лос Анџелес стана жариште на протестите откако се појавија информации дека притворените лица се наоѓаат таму. На зградата беа испишани графити, а според Си-Би-Ес, кон полицијата биле фрлани предмети, што доведе до прогласување на протестите за незаконско собирање.
Шерифот на округот Лос Анџелес синоќа извести за нов протест во градот Парамаунт, каде што наводно била спроведена уште една имиграциска рација. Околу 400 луѓе учествувале на протестите, а полицијата повторно прогласи незаконско собирање, обидувајќи се да ги растера демонстрантите „без насилство“, изјави шерифот Роберт Луна.
Имиграциските рации се интензивираа под администрацијата на претседателот Доналд Трамп, кој минатиот месец нареди федералните агенти дневно да апсат 3.000 лица.
Како одговор на тензиите, Трамп нареди распоредување на 2.000 припадници на Националната гарда во Лос Анџелес, додека министерот за одбрана најави можна мобилизација на маринци доколку насилството продолжи.
На социјалните мрежи, Трамп им се заблагодари на Националната гарда за „добро завршената работа“ и ги критикуваше демократските лидери, заканувајќи се дека „протестите на радикалната левица нема да бидат толерирани“. Исто така, тој забрани носење маски на протестите.
Полицијата во Лос Анџелес потоа приведе неколку лица во близина на имиграцискиот притворски центар, каде што демонстрантите се собираа во текот на денот. „Повеќе лица се приведени поради непочитување на повеќекратните предупредувања за разидување“, објави LAPD на платформата Икс.
Гувернерот Њусом го обвини министерот за одбрана Пит Хегсет за „вознемирувачко однесување“ поради заканите за испраќање маринци против демонстрантите, додека Хегсет изјави дека маринци од базата Кемп Пендлтон се во состојба на висока готовност.
Ова е првпат од немирите во Лос Анџелес во 1992 година американски претседател да ја стави Националната гарда под федерална контрола за да ги сузбие протестите.
Немирите во 1992 година, предизвикани од ослободителната пресуда за полицајците кои го претепаа Родни Кинг, резултираше со десетици загинати, илјадници повредени и штета од над една милијарда долари.
