Македонски
Американскиот претседател Доналд Трамп ги критикуваше анкетите што покажуваат пад на неговиот рејтинг на одобрување, нарекувајќи ги „лажни“ и наведувајќи дека треба да бидат „истражени“, пренесува Танјуг.
Трамп во објава на неговата мрежа TruthSocial изјави дека анкетата на „Њујорк тајмс“, како и на „Еј-Би-Си њуз“, „Вашингтон пост“ и „Ипсос“, не опфатила доволен број анкетирани гласачи, иако тој не даде докази за тоа тврдење, објави „Ен-Би-Си њуз“.
Тој рече дека оние што ги спроведоа анкетите „треба да бидат испитани за изборна измама“, наведувајќи дека тие се „негативни криминалци“ и „непријатели на народот“.
Како што се приближува кон крајот на неговите први 100 дена на функцијата, популарноста на претседателот Трамп опаѓа, при што мнозинството граѓани не ги одобруваат неговите клучни иницијативи и постои перцепција дека неговата администрација се обидува да избегне почитување на наредбите на федералниот суд, според анкетата на WP Post, ABC News и Ipsos објавена во неделата.
Во анкетата, меѓу другото, како што пишува WP, се наведува дека поддршката за Трамп е помала отколку за кој било претходен претседател на 100-дневната пресвртница во првиот или вториот мандат.
Половина од Американците не се задоволни од работењето на претседателот Доналд Трамп во текот на неговите први 100 дена на функцијата, според втора анкета на Центарот за истражување на јавни работи на АП и NORC, објавена во саботата.
