Македонски
Речиси 1.500 мигранти пристигнаа на шпанските Канарски Острови во саботата, што е најголем број во еден ден од 2020 година, пренесува денеска агенцијата ЕФЕ.
Шпанската крајбрежна стража спаси вкупно 1.488 луѓе од 14 пловни објекти, пренесува ЕФЕ, со што продолжува бранот на пристигнувања од Западна Африка кон островите што започна во октомври.
Претходниот дневен рекорд изнесуваше 1.461 лице спасено во водите околу Канарските Острови, соопштија денеска поморските служби за спасување, пренесува Ројтерс.
Еден чамец вчера превезувал 240 луѓе, меѓу кои 12 жени и 36 деца, соопштија властите.
Спасените мигранти беа однесени на Ел Јеро, еден од најмалите Канарски Острови.
Повеќето од луѓето беа од Сенегал, Гамбија и Гвинеја.
Шпанскиот министер за територијална политика, Анхел Виктор Торес, денес ќе го посети Ел Јеро за да разговара за ненадејното зголемување на пристигнувањата на мигранти.
Атлантската рута од Западна Африка до Канарските Острови е една од најсмртоносните мигрантски рути во светот, а илјадници луѓе секоја година се обидуваат да ја преминат во преполни чамци.
Бројот на пристигнувања обично се зголемува во текот на есента, кога условите на море долж рутата се генерално помирни и поповолни за преминување.
Бројот на мигранти кои пристигнале на Канарските Острови во периодот од јануари до 31 октомври е за 5,5 отсто помал во споредба со истиот период минатата година, покажуваат владините податоци.
