Македонски
Посетителите на галеријата „Дарк Матер“ во Берлин имаат можност да уживаат во несекојдневно искуство, лизгање низ волшебна светлосна шума, создадена преку уметничката инсталација „Винтерлајтс“, дело на германскиот уметник Кристофер Баудер. Инсталацијата содржи повеќе од 600 дрвја и над 300.000 светилки кои создаваат посебен амбиент.
Кристофер Баудер е познат медиумски уметник од Берлин. Посетителите можат да уживаат во глетката со посета на неговата галерија. Ваквиот несекојдневен пејзаж опфаќа површина од над 1.000 квадратни метри, со повеќе од 600 дрвја кои висат од таванот, додека пак, над посетителите се протега светлосна мрежа составена од над 300.000 светилки.
Под необичната шума се наоѓа лизгалиштето каде што посетителите можат да уживаат во лизгањето, опкружени со впечатливи светлосни ефекти. За време на лизгањето просторот се осветлува со различни бои како сина, зелена, црвена и виолетова, создавајќи необична комбинација од природни мотиви и современа светлосна уметност.
Ваквата имагинација им нуди на посетителите поинакво доживување на зимската идила, давајќи им можност за лизгање во уметнички обликувана шума, во која висечките дрвја и илјадниците светлосни ефекти создаваат волшебен простор.
Со проектов успешно ги обединив архитектурата, технологијата и светлосната уметност, претворајќи ја Галеријата во место каде што посетителите можат истовремено да уживаат во уникатната уметничка инсталација, како и во една од омилените зимски активности, лизгањето на мраз“, изјави Баудер.
