Македонски
„Филипче рече дека Македонија не е на продажба, откако со Заев ја распродадоа за стан, зграда и златна виза за Дубаи“, обвини ВМРО-ДПМНЕ во соопштение по прес-конференцијата на пратеникот Бране Петрушевски.
Од партијата велат дека во времето кога Венко Филипче и Зоран Заев биле на власт било променето името на државата, а ветувањето за брзо членство во Европската Унија, според нив, не било исполнето.
„Филипче со Заев го променија името на државата и ветуваа членство во ЕУ, а добивме само слика од авион“, наведуваат од ВМРО-ДПМНЕ.
Партијата упатува критики и за здравствената политика на претходната власт, посочувајќи ги набавките на вакцини, модуларните болници и тендерите.
„Филипче и Заев ветуваа бесплатно здравство, а добивме провизии за вакцини, провизии за модуларни болници и провизии за тендери и набавки“, се наведува во соопштението.
Од ВМРО-ДПМНЕ го обвинуваат Филипче и за, како што велат, спротивставени ставови во однос на односите со Бугарија.
„Филипче вели дека Македонија не била за продажба, а има потпишан бланко лист за барањата на Бугарите“, велат од партијата.
Во соопштението се упатуваат критики и за односот на Филипче кон инвестициите и различни проекти во земјава.
„На Филипче му смета успехот на Македонија. Затоа е против дата центри, рудници и фабрики. Ама не е против бугарски фирми, златни визи и акции во индиски авиокомпании“, наведуваат од ВМРО-ДПМНЕ.
Од партијата се осврнаа и на ставовите на Филипче во однос на музичките настани, посочувајќи го неговото спротивставување на настапот на Дејвид Гета и правејќи споредба со концертите на Харис Џиновиќ.
„Тоа се двојните стандарди на Филипче и СДС. Затоа и ќе бидат вечна маргинална опозиција“, заклучуваат од ВМРО-ДПМНЕ.
СДСМ пак обвинуваат дека Владата предводена од Христијан Мицкоски ги става природните ресурси и националните богатства на располагање на приватни компании.
„Мицкоски ја распродава Македонија. Земјата, водата, рудата, природните ресурси, националните богатства ги нуди на компании. Одлучил Мицкоски сам, народот никој не го прашува“, изјави Кети Штерјова од СДСМ.
Таа посебно се осврна на најавените дата-центри, тврдејќи дека одлуката за нив веќе е донесена.
„Дата-центрите ја загреваат водата, трошат огромни количества електрична енергија, а сметката ја плаќаат граѓаните и земјоделците кои ќе останат без вода. Нема нови работни места, нема профит за државата – профит има само за компанијата“, рече Штерјова.
Од СДСМ го отворија и прашањето за најавите за ископување антимон, при што Штерјова предупреди на можните последици врз животната средина и здравјето на населението.
„Водата е најважниот ресурс. Во време кога водата на повеќе од 50 места во Македонија е загадена, Мицкоски сака да копа антимон“, рече таа.
Според Штерјова, ископувањето антимон може да носи ризици од изложеност на прашина и загадување на подземните води.
„Водата тогаш може да содржи антимон и други тешки метали. Јасно ви е колку може да биде опасно, кога сега во водата имаме бактерии од фекално загадување, а замислете го и ова“, додаде таа.
Штерјова се осврна и на состојбата со водоснабдувањето во Гостивар, при што изнесе тврдење дека веќе 11 недели не е добиен извештај дека водата е исправна, иако, како што рече, повеќе од 5.000 луѓе завршиле во болница.
„Како оваа неспособна власт ќе се справи со ризиците од рудник за антимон?“, праша Штерјова.
Таа го спореди ископувањето антимон со литиумот и тврдеше дека вакви проекти биле запрени на повеќе места во Европа поради ризиците за животната средина и населението.
СДСМ обвини: Мицкоски одлучил да ги истера луѓето од сопствената земја
Од СДСМ упатија и директни политички обвинувања кон премиерот Мицкоски, тврдејќи дека преку различни проекти се загрозуваат јавните ресурси и интересите на граѓаните.
„Изгледа дека Мицкоски одлучил да им ги земе сите пари на граѓаните, да земе провизија од секој проект и да ја упропасти целата држава. Да ги истера луѓето од сопствената земја“, рече Штерјова.
Од СДСМ побараа граѓаните да бидат директно вклучени во одлучувањето за изградба на рудници во нивните средини.
„Мицкоски нема право да ја распродава земјата, водата, рудите, националните богатства. Мора граѓаните да се прашаат. Во средините во кои што живеат да се изјаснат на референдум дали сакаат или не сакаат, близу до нивните места на живеење, да се градат рудници. Бараме референдум! Македонија не е на распродажба“, порача Штерјова.
