Македонски
Во текот на изминатото деноноќие, на територијата на целата земја биле приведени 13 лица поради „безобѕирно управување со возило“. Од нив, 11 управувале возило без возачка дозвола, и тоа од Велес, Скопје и Прилеп, додека двајца возачи, од Куманово и Скопје, управувале возило под дејство на алкохол, соопшти МВР.
Воедно, кај возач од Скопје кој управувал возило без возачка дозвола, било констатирано дека на патничкото моторно возило предната регистарска таблица не припаѓала на возилото.
По целосно документирање на случаите, ќе бидат поднесени соодветни кривични пријави.
Министерството за внатрешни работи продолжува со засилените контроли во сообраќајот, со цел санкционирање на несовесните возачи и спречување на однесувања со кои се загрозува безбедноста на сите учесници во сообраќајот. Почитувањето на сообраќајните правила и прописи, поседувањето важечка возачка дозвола и управувањето со возило во трезна состојба се основа за безбеден сообраќај, се вели во соопштението на МВР.
