Македонски
Техеран денеска повторно ја предупреди Бугарија, членка на НАТО, да не дозволи нејзината територија да се користи за израелски или американски воени операции против Иран, порачувајќи дека го задржува правото да го нападне изворот на секој напад.
„Немаме никаков проблем со бугарскиот народ. Меѓутоа, јасно ставивме до знаење дека секое дејствување кое, според меѓународното право, претставува поддршка на американско-израелската воена агресија врз Иран, истовремено претставува и учество во чин на агресија“, изјави портпаролот на иранското Министерство за надворешни работи, Есмаил Багаеи.
Тој додаде дека „Иран има право да го нападне изворот, односно местото на потекло, на секој чин на агресија против него“.
„Претходно беше објавено, а извештаите го потврдија тоа, дека неколку авиони за снабдување со гориво полетале од бугарска територија. Како што признаа и бројни бугарски граѓани и политичари, одобрувањето на престојот на тие авиони во бугарска база е спротивно на меѓународното право и претставува поддршка на воената агресија на Соединетите Американски Држави и израелскиот режим против Иран“, рече тој.
Иран и претходно ја предупредуваше оваа балканска земја, која исто така е членка на Европската Унија, да не им дозволи на САД да ги користат нејзините воздушни бази во војната.
Минатиот месец, бугарскиот парламентарен Комитет за одбрана го одобри предлогот на владата со кој се овозможува привремено распоредување американски авиони-цистерни за дополнување гориво во воздух, како и американски воен персонал, во воздухопловната база Безмер. Овој потег предизвика остро предупредување од Иран поради овозможувањето американски воени операции.
Багаеи тогаш изјави дека секое учество во планирањето или спроведувањето на таквите операции би претставувало соучесништво во „злосторство на агресија и воени злосторства“. Тој го повика бугарскиот парламент да го отфрли распоредувањето на американските сили.
Багаеи денеска додаде дека Иран „веќе долго игра шах“, а дека во последните години „научил да игра и покер“, алудирајќи на развојот на воената стратегија на Техеран.
