Македонски
В петок, на 26 јуни на програмата на Скопско лето ќе се одржат следните настани.
Во Културно информативниот центар – Скопје со почеток во 19:00 часот ќе се отвори фотографска изложба насловена „Мали нешта“ на Анне-Мет С. Сомер од Данска, авторка зад Kelter Photography.
Настанот е во соработка со „Зрно“ Фестивал.
Изложбата претставува избор на дела што го следат нејзиниот уметнички развој – од серијата „Течни фустани“, создадена со техниката на полароид емулзиски лифт, до понови истражувања како Polaroid Decay, film soup техники, интервенции со алкохолни мастила и експериментални емулзиски лифтови.
Серијата „Течни фустани“ настанала од случајна грешка за време на работилница во Копенхаген во 2018 година, кога еден емулзиски лифт се деформирал при трансфер и добил форма налик на фустан. Наместо да го отфрли, авторката ја прифатила случајноста како творечки принцип. Денес серијата брои 311 оригинални нумерирани дела и е изложувана во Норвешка, Данска, Германија, Швајцарија, Ирска и САД.
Покрај оваа серија, посетителите ќе имаат можност да видат и колекција од Polaroid Decays, емулзиски лифтови и полароиди обработени со алкохолни мастила и други интервенции. Низ овие дела фотографијата се трансформира од документарна слика во простор за истражување на сеќавањето, кревкоста, емоцијата и убавината на несовршеното.
Анне-Мет С. Сомер е членка на The 1212 Project, ирскиот уметнички колектив Interface Inagh и германскиот полароид колектив PolaPeopleFestival, а нејзината работа е претставувана и од Oscar Studio Gallery во Осло.
Во Сули ан, со почеток во 20:30 часот ќе се одржи концерт насловен „Песната е лек“ на Женскиот хор „Фрида од Македонија“, под диригентската палка на Сузана Турунџиева.
Концертот „Песната е лек“ на Аматерскиот женски хор „Фрида од Македонија“ носи вечер исполнета со емоција и заедништво. Преку хорски обработки на познати балади, филмска музика и популарни мелодии, хорот ја открива моќта на музиката како простор за поврзување, инспирација и внатрешна сила.
Билетите се во продажба на karti.com.mk.
Со почеток во 20:30 часот на сцената на НУ Турски театар ќе се одигра театарската претстава „Женидба“, според мотиви од Николај В. Гогољ, а во режија и кореографија на Кренаре Невзати-Кери.
Сценска драматизација и драматург: Викторија Рангелова Петровска
Автор на видео материјали и дизајн на плакат: Мурат Жерка
Избор на музика: Кренаре Невзати- Кери
Превод и титл: Дин Ибрахим
Машки костими: Барбара Цвејик Рив
Кројач: Исмаил Рамадани
Играат:
Сузан Акбелге, Селпин Керим, Џенап Самет, Неат Али, Слаѓана Вујошевиќ, Емине Халил, Јеткин Сезаир, Хакан Даци.
Директор: Осман Али
Инписциент: Ердинч Рушид
Светло: Бекир Кубур
Тон мајстор: Емрах Џемаили
Гардероба: Мухамед Бакиоски
Суфлер: Нериман Шенгулер
Шминка: Севим Керим
Шеф на сцена: Зекирија Абди
Сценска техника: Мехмет Исмаил, Суат Рахман, Џенгиз Халил, Изудин Беговиќ и Булент Хасан
Организатор: Шенхан Зекир
Овој проект е реализиран со поддршка на Министерството за култура и туризам на Република Македонија.
Продукција НУ Турски Театар Скопје , 2025
