Македонски
Министерот за внатрешни работи, Панче Тошковски, денеска оствари работна средба со амбасадорот на Европската Унија во земјава, Михалис Рокас, на која главен акцент бил ставен на имплементацијата на реформите и зајакнувањето на капацитетите на полицијата.
За време на разговорот, како што информираат од МВР, се дискутирало за клучните аспекти на соработката со Брисел, како и за тековните проекти кои се спроведуваат со европска помош.
Министерот Тошковски преку социјалните мрежи упати благодарност до европските партнери за досегашната поддршка:
„Остварив средба со амбасадорот на Европската Унија во Македонија, Михалис Рокас, на која разговаравме за реформските процеси, унапредувањето на капацитетите на Министерството за внатрешни работи и продолжување на силната партнерска соработка со Европската Унија. Изразив благодарност за континуираната поддршка што Европската Унија ја дава на Министерството за внатрешни работи преку ИПА програмите, реформската агенда и заедничките проекти насочени кон модернизација на институциите и јакнење на безбедносниот систем.“
На средбата биле отворени и прашањата за регионалната безбедност, како и за засилување на контролата и соработката на граничните премини.
„Разговаравме и за активностите во рамки на прекуграничната соработка, како и за заедничките приоритети поврзани со справувањето со современите безбедносни предизвици. Остануваме посветени на градење модерно, професионално и европско Министерство за внатрешни работи, кое ефикасно ќе одговори на потребите на граѓаните и предизвиците на времето“, соопшти министерот Тошковски.
