ФМУ со годишен концерт насловен „ОРИОН – каде што се раѓаат ѕвездите“ одбележува 59 години постоење

Факултетот за музичка уметност – Скопје со гордост го најавува својот годишен концерт, оваа година насловен „ОРИОН – каде што се раѓаат ѕвездите“, по повод 59-годишнината од постоењето на институцијата.

 Прославата ќе се одржи во петок, 5ти декември, со почеток во 20:00 часот во Големата концертна сала на македонската Филхармонија.

Алма матер на речиси сите истакнати уметници во земјата, регионот и пошироко, Факултетот за музичка уметност – Скопје останува централниот столб на музичкото и балетското образование, создавајќи генерации уметници – изведувачи, педагози и творци, кои го обликуваат и водат уметничкиот живот во Македонија и раководат со најзначајните музички и културни институции.

Концертната програма ќе ја изведат:

• Симфонискиот оркестар на ФМУ;

• Мешаниот хор „Драган Шуплевски“;

•  Камерниот гудачки оркестар „ФМУ Солисти“;

•  Оркестар од народни инструменти и солисти;

• Студенти од Катедрата за балетска педагогија;

•  Студенти од Катедрата за џез и популарна музика;

• Дувачкиот ансамбл на ФМУ, 

под диригентските палки на проф. м-р Цанев, проф. м-р Татарчевски и доц. м-р Спироски

Музичка програма содржи дела од Пурсел, Сен-Санс, Прокофјев, Тиле/Вајс, Коен, Сусато, Горецки, Гершвин, Македонска традиционална музика, како и нови композиции од нашите студенти од одделот за џез и популарна музика, А. Голчева и М. Цветановска.

Ќе ни биде чест и задоволство да ни се придружите на нашата прослава на музиката, уметноста и наследството на институцијата кое продолжува да ја осветлува културната сцена.

Влезот е слободен.