Македонски
Неврологот доктор Тим Ритман предупредува дека раните знаци на деменција честопати може да се покажат на суптилни начини, кои лесно се занемаруваат. Доктор Ритман истакнува дека промените во расположението и однесувањето може да бидат меѓу првите показатели за оваа состојба.
Овие промени честопати погрешно се толкуваат како вообичаени знаци на стареење или последица од стрес, но всушност може да укажуваат на почеток на когнитивно опаѓање. Доктор Ритман особено ги посочува постојаното лошо расположение и зголемената анксиозност како чести рани симптоми на деменција.
Луѓето може да чувствуваат тага или непријатност без јасна причина. Тие емоционални промени можат да влијаат врз секојдневниот живот и социјалните односи. Важно е да се разбере дека таквите нарушувања на расположението не се исклучиво поврзани со деменција и може да бидат симптоми на други состојби.
Меѓутоа, ако се појавуваат заедно со други когнитивни промени, би требало сериозно да се земат предвид.
Препознавањето на раните симптоми е од клучно значење, бидејќи раната интервенција може да придонесе за подобро контролирање на оваа болест. Доколку познавате некој што постојано е лошо расположен или анксиозен, особено ако тоа е придружено со проблеми со помнењето или конфузија, се препорачува итна лекарска консултација.
Симптомите на деменција вклучуваат:
- Губење на помнењето
- Проблеми со концентрацијата
- Проблеми при извршувањето познати, секојдневни задачи
- Тешкотии при следење разговор или пронаоѓање на вистинските зборови
- Збунетост во врска со времето и просторот
- Промени во расположението
Иако деменцијата честопати се поистоветува со губење на помнењето, важно е да се препознаат и другите рани симптоми, како што се лошото расположение и анксиозноста.
Навременото реагирање и барање лекарска помош кога ќе се појават тие симптоми може да бидат од клучно значење. Со препознавањето на целиот спектар на раните знаци се овозможува навремена интервенција и подобри резултати. Ако сте загрижени поради можните симптоми на деменција, не двоумете се да се обратите кај здравствен експерт за совет и помош.
Извор: Убавина и здравје
