Македонски
Францускиот претседател Емануел Макрон вечерва во 20 часот ќе ѝ се обрати на нацијата, по масовните протести што во саботата прераснаа во насилни судири, палење објекти и ограбување продавници низ Франција.
Како што соопшти Елисејската палата, обраќањето ќе следува по состанокот на Макрон со премиерот и надлежните министри, закажан за 17:30 часот, на кој ќе се разговара за состојбата во земјата по немирите.
Протестите беа предизвикани од незадоволството поради високите трошоци за живот и состојбата на јавните услуги, вклучително и образованието. Иако голем дел од демонстрациите беа мирни, во повеќе градови дојде до судири со полицијата, вандализам, грабежи и пожари.
Во Лимож беше зафатено од пожар историското градско собрание, додека во Париз и други градови беа оштетени продавници и јавни објекти.
Според извештаите на светските медиуми, речиси 1.800 лица биле уапсени по немирите, а стотици припадници на полицијата и безбедносните служби биле повредени. Еден демонстрант починал од срцев удар.
Обраќањето на Макрон доаѓа во момент на зголемен притисок врз француската влада поради справувањето со социјалното незадоволство и насилството. Засега нема официјално објавени детали за конкретната содржина на претседателското обраќање.
