Македонски
Во изминатите две години се реализирани повеќе реформи во јавната администрација, насочени кон создавање професионални, ефикасни и одговорни институции, со цел граѓаните да добиваат поквалитетни услуги, соопштија од ВМРО-ДПМНЕ.
Оттаму посочуваат дека е донесен Законот за високи раководители, со кој за првпат се воспоставува единствен систем за избор на највисоките раководни позиции преку јавен оглас, јасно утврдени критериуми и избор врз основа на знаење, компетентност и професионално искуство. Според партијата, законот предвидува и механизми за следење на работата на раководителите и поголема одговорност за постигнатите резултати.
Во соопштението се наведува дека Академијата за јавна администрација ја има водечката улога во спроведувањето на обуките, а преку модернизацијата на Центарот за обука повеќе од 1.000 административни службеници веќе посетиле обуки и добиле пристап до современ електронски систем за учење.
Од ВМРО-ДПМНЕ додаваат дека паралелно се унапредуваат системите за управување со човечките ресурси, се зголемува транспарентноста и се подобрува процесот на подготовка на законите преку пошироки јавни консултации.
Според партијата, овие промени треба да придонесат за администрација во која стручноста ќе биде во прв план, а институциите ќе работат поодговорно и поефикасно.
Од ВМРО-ДПМНЕ најавуваат дека реформите во јавната администрација ќе продолжат и во наредниот период, со цел изградба на модерна, професионална и ефикасна администрација.
