Македонски
Во понеделник, на 16 декември 2024 година, во малата сала на НУЦК Трајко Прокопиев во Куманово, ќе може да уживате во поетско музичка вечер со концерт на уметникот Сашко Костов и учениците од кумановските училишта, по повод 116 годиnи од раѓањето на Коста Солев Рацин.
Сашко Костов е роден во Велес, завршува Џез академија – Тапани и афрички перкусии во класата на Алек Секуловски и Илија Пеовски. Мулти-инструменталист кој води до кулминација на инспирацијата – музика која е тесно врзана за неговите влијанија и потекло. Со првото слушање, и покрај сложеноста на неговите композиции, тие допираат до публиката и не ја оставаат рамнодушна.
Работејќи на музичката сцена од 1995-та година, Сашко наоѓа место во индустријата, за фокусирање на неговата соло кариера, а воедно и компонирањето на музика за театарски претстави и филм стана негова пасија. Костов твори интригантен звук и во исто време останува верен на сопствените творечки стремежи.
Посветен на својот занает и полн со еклектични идеи, овој уметник знае како се користи поетскиот стих за да ги разубави своите музички тонови и ритмови. Вокалите се неговото најмоќно оружје.
Покрај работата во театар, филм и сопствена авторска музика, тој е близок соработник со Горан Трајкоски, Мугер Фугер, Ласт Експедишн, Electric Audrey група која е формирана во Турција, заедно со браќата Гокцел и Гоксен Ергене.
