Арсовски во пресрет на 53. МОВ: Да уживаме заедно во музиката, танцот и вистинските емоции кои Мајските оперски вечери ги носат повеќе од половина век

Во духот на традицијата и со поглед кон иднината, Националната опера и балет го најавува 53. издание на еден од најзначајните културни настани во земјата – Мајските оперски вечери. Во официјалното обраќање до јавноста, директорот Оливер Арсовски  ја претстави годинешната програма. Подолу ви го пренесуваме неговото обраќање.

Почитувани љубители на уметноста,

Чест и задоволство ми е, во име на Националната опера и балет, да ве поканам на 53. Мајски оперски вечери, кои ќе се одржат од 9 до 31 мај 2025 година.

Стремејќи секогаш кон тоа, на вас, нашата верна публика, да ви понудиме интересни и ексклузивни настани, и оваа година подготвивме програма која верувам дека ќе ги задоволи и највисоките уметнички критериуми.
Мајските оперски вечери 2025 година ветуваат богато уметничко доживување, обединувајќи ја традицијата и иновацијата, домашното и меѓународното творештво.

Фестивалот ќе го отвориме на 9 мај во 20:00 часот со премиерното изведување на „Риголето“ од Џузепе Верди, едно од најдраматичните оперски дела кое преку силна музичка и сценска интерпретација ги комбинира темите како љубов, моќ и одмазда.

На 15 мај во 20:00 часот, повторно ќе уживаме во безвременската убавина на балетот „Лебедово Езеро“ од Петар Илич Чајковски, дело кое преку грациозноста на движењата и мајсторската музика ја раскажува приказната за љубовта и судбината.

19 мај во 20:00 часот, публиката ќе има можност да ја проследи монументалната опера на Верди, „Набуко“, позната по хорот „Va, pensiero“ – химна на слободата и силата на духот.

Емотивната и трогателна приказна на Пучиниевата „Мадам Батерфлај“ ќе биде изведена на 23 мај во 20:00 часот, прикажувајќи ја судбината на младата гејша преку незаборавни мелодии и длабоки емоции.

Раскошната опера „Турандот“ на Џакомо Пучини, со славната арија „Nessun dorma“, е закажана за 27 мај во 20:00 часот, носејќи приказна за љубовта, гордоста и искупувањето.

Нашиот уметнички фестивал свечено ќе го затвориме на 31 мај во 20:00 часот со изведбата на величествената опера на Верди „Аида“, еп за љубовта, жртвата и вечните вредности.

Ве поканувам да бидете дел од оваа величествена прослава на уметноста, да уживаме заедно во музиката, танцот и вистинските емоции кои Мајските оперски вечери ги носат повеќе од половина век.

Со нетрпение очекувам да се сретнеме.