Македонски
Од 1 јануари до 30 септември годинава казнети се 18 458 возачи кои учествувале во сообраќајот без да имаат возачка дозвола. Најмногу вакви прекршоци се евидентирани на подрачјата на секторите за внатрешни работи Струмица и Скопје, 3 275 и 3 202 прекршоци, соопшти денеска МВР.
На територија на СВР Битола санкционирани се 2 811 возачи за возење без возачка дозвола, на подрачје на СВР Тетово изречени се 2 086 мерки, а во СВР Куманово санкционирани се 1 660 возачи за управување без возачка дозвола.
Од страна на Мобилната единица за безбедност на сообраќајот на патиштата во овој временски интервал биле изречени 1 634 мерки за возачи кои учествувале во сообраќајот спротивно одредбите во членот 225 од Законот за безбедност на сообраќајот на патиштата, односно возеле без возачка дозвола, додека пак на територија на Секторот за внатрешни работи Велес 1 466 возачи управувале возило без возачка дозвола, на подрачје на СВР Штип изречени се 1 238 мерки, а на територија на СВР Охрид 1 086 санкции.
Во првата недела од октомври, односно заклучно со 7 октомври 2025 година во рамки на сообраќајните контроли досега констатирани се 373 прекршоци за учество во сообраќај без возачка дозвола.
Засилените сообраќајни контроли продолжуваат и во наредните денови. Апелираме до граѓаните да се почитуваат сообраќајните правила и прописи и со тоа сите да придонесеме за посигурни и побезбедни патишта за сите нас, се наведува во соопштението од МВР.
