Македонски
Обилните врнежи од дожд што го зафатија источниот дел на земјата во изминатите денови утрово предизвикаа поплавени простории и дворови на повеќе локации во Општина Чешиново-Облешево, меѓу кои и во селата Чешиново, Облешево и Чифлик, информира Центарот за управување со кризи.
Според податоците добиени од градоначалникот, локалната самоуправа со сите расположливи ресурси работи на терен. Во интервенциите се вклучени и ТППЕ Кочани, Водостопанство „Брегалница“ и Регионалниот центар за управување со кризи – Кочани. Побарана е и дополнителна опрема, особено за испумпување вода од поплавените објекти. Поради интензивните врнежи, водостојот на реките Брегалница и Кочанска река е значително зголемен, а на неколку точки во општините Штип и Чешиново-Облешево е забележано нивно излевање од коритата.
Неповолните временски услови утрово предизвикаа и свлечишта на експресниот пат Радовиш–Штип, како и на патниот правец Злетово – брана Кнежево. ЦУК веднаш го извести ЈП Македонија пат, чиј екипи излегоа на терен и интервенираа. Свлечиште е пријавено и во липковското село Липково, на локацијата Кисела Вода. Оттаму информираат дека општината располага со ограничени ресурси за справување со вакви ситуации, па поради сериозноста на состојбата побарана е поддршка од државните институции.
