Македонски
Цените на гасот во Европа на берзата TTF во Амстердам се зголемија за шест проценти во последните денови на 42,4 евра за мегават-час, што е највисоко ниво од март 2025 година.
Зголемувањето на цената следеше по падот на испораките на течен природен гас (LNG) од Соединетите Американски Држави, бидејќи зимските бури го нарушија производството и го намалија протокот на гас до американските извозни терминали, во време кога Европа се подготвува за нов студен бран, објавува Trading Economics- пренесе Политика. Европа во голема мера се потпира на американскиот LNG откако ги прекина испораките преку руските цевководи поради војната во Украина, што ја направи Европската Унија поранлива на прекини во снабдувањето од Соединетите Американски Држави.
Цените на гасот во САД продолжуваат да растат, што ја влошува и ситуацијата на европскиот пазар на гас, за кој САД стануваат не само главен снабдувач, туку и конкурент за достапните ресурси во периоди кога побарувачката е на врвот, се вели во денешното соопштение на руската компанија „Газпром“. „Газпром“ забележа дека помеѓу 16 и 27 јануари, цената на гасот во централата „Хенри Хаб“ се зголемила повеќе од двојно и се искачила на 245 долари за 1.000 кубни метри, што е највисоко ниво од декември 2022 година.
Зголемувањето на цената ги охрабри некои компании да увезуваат течен природен гас (LNG) на американскиот пазар, и покрај улогата на САД како главен извозник, што дополнително ја интензивира конкуренцијата за слободни количини гас, објавува „Ведомости“. Ова ја влошува позицијата на Европа, за која Вашингтон станува и главен снабдувач и директен конкурент во периодите на најголема побарувачка. Во такви услови, европскиот пазар се приближува кон ситуација во која би можел да ја изгуби трката за LNG во корист на домашниот американски пазар, слично на она што веќе се случи со некои азиски потрошувачи, додаде „Газпром“.
Податоците од организацијата „Гас Инфраструктура Европа“ покажуваат дека стапката на искористеност на залихите на гас во европските подземни складишта паднала на 44,95 проценти, или помалку од 50 милијарди кубни метри, додека околу 47 милијарди кубни метри гас се повлечени од складиштата од почетокот на грејната сезона.
