Македонски
Српското Министерство за надворешни работи соопшти дека со загриженост ги следи изјавите и најавите на одредени функционери во регионот во врска со потпишувањето и проширувањето на билатералните договори за воена соработка, предупредувајќи дека ваквите потези би можеле да предизвикаат нови тензии на Балканот.
„Србија потсетува дека целиот Балкан останува чувствителна постконфликтна област во која зачувувањето на мирот и стабилноста е од суштинско значење, како за земјите од регионот, така и за Европа како целина“, се вели во соопштението.
Министерството нагласува дека секој недоволно транспарентен потег што би можел да се протолкува како создавање воени блокови или сојузи насочени против трети страни само ги продлабочува поделбите и ја поткопува довербата. „Недостатокот на транспарентност и отсуството на нормални консултации во врска со ваквите договори поттикнуваат атмосфера на недоверба, што е спротивно на европските вредности на дијалог, предвидливост и меѓусебно почитување“.
Исто така, се истакнува дека некои од земјите што склучуваат вакви договори се веќе членки на НАТО, што покренува прашања за вистинските мотиви и политичката симболика на овие договори. „Не ги разбираме причините за исклучување на одредени земји од ваквите форми на соработка“, нагласи Министерството.
Како вистински пат за зајакнување на довербата и соработката во регионот, Србија предлага инвестирање во механизми за заедничка обука, цивилна заштита и координиран одговор на вонредни состојби – како што се поплави, пожари и земјотреси – што би донело конкретни придобивки за сите граѓани.
„Србија останува цврсто посветена на мирот, стабилноста и соработката во регионот и очекува сите партнери да дејствуваат одговорно во овој дух, почитувајќи ги легитимните интереси на сите страни“, заклучи Министерството за надворешни работи на Србија во соопштението.
