Македонски
Помина една година од исчезнувањето и убиството на двегодишната Данка Илиќ. Пред да се потврди веста за убиството, по неа полицијата, спасувачките служби и граѓаните трагаа цели 10 дена. Иако по вторпат беше потврдено обвинението против осомничените за убиство, Дејан Драгијевиќ и Срѓан Јанковиќ признаа дека го извршиле убиството, но потоа го повлекоа признанието. Братот на Драгијевиќ, Далибор, признал во полиција дека им помогнал да го сокријат телото, но тој почина за време на полицискиот притвор и не стигна до обвинителството. Oвој случај, пишува српската Нова.рс, цела година подоцна, сè уште е обвиен со мистерија, а главното прашање што се поставува и денес е – каде е телото на девојчето?
Двегодишната Данка Илиќ исчезна на 26 март 2024 година, во населбата Бањско Поље кај Бор, додека била со мајка си и братот пред ненаселената куќа на семејството. Како што кажа мајката на Данка Илиќ од самиот почеток, отишла да му даде вода на синот, а кога се свртела, Данка ја немало. Откако сама ја барала, го повикала сопругот, а потоа била повикана полиција. Таа вечер за прв пат во Србија беше активиран системот „Најди ме“.
Во првите денови од потрагата, багери го расчистуваа просторот каде исчезна девојчето, а во околината полицијата и спасувачите со кучиња трагаа по девојчето. Се копаше во близина на местото каде што исчезна девојчето, а беа прегледани и бунари и подземни канали околу куќата, додека хеликоптери ја надлетуваа населбата. Полицијата извршила претрес во куќите во селото, ја проверила идентификацијата на мештаните и собрала информации дали некој го видел девојчето критичниот ден, а биле прегледани и шахтите на луѓето во нивните дворови.
Во првите денови од претресот беа извршени неколку апсења. Полицаец од Бор е затворен поради сомнение дека оддавал информации од истрага, како и двајца мажи во Босна и Херцеговина кои барале 25.000 евра за да дадат информација за исчезнато девојче, за што се покажало дека се лажни информации, а мажите сакале да ја искористат ситуацијата, но наместо тоа беа уапсени.
Родителите на девојчето во текот на првите пет дена од претресот постојано биле повикувани на разговор во полиција, а подоцна за евентуално да дадат некакви информации кои би помогнале во потрагата по девојчето.
Шестиот ден во потрагата се вклучи и виенската полиција со оглед на тоа што се појави снимка од девојка во Виена која неверојатно личи на Данка, а беше издадена и жолта потрага по исчезнати лица од Интерпол. Девојчето од видеото дури и на членовите на нејзиното пошироко семејство личеше на Данка, но една жена од Австрија се огласи и рече дека на видеото е таа со нејзината ќерка, а сомнежите дека Данка е во Австрија беа отфрлени.
На десеттиот ден од потрагата беше соопштено дека Данка Илиќ е убиена и дека за убиството се уапсени двајца осомничени. Веднаш беше соопштено дека уапсените во полиција признале дека го извршиле убиството. Како што беше кажано, девојчето го удриле со автомобил, ја ставиле во багажникот, а потоа телото го фрлиле во депонија на Старобањски пут.
Полицијата соопшти дека осомничените го признале убиството на девојчето и детално опишале како го сториле тоа, но дека нивната соработка со полицијата завршила кога се дошло до прашањето каде е скриено телото на девојчето, со оглед на тоа што не сакале да го откријат.
Уапсен е и братот на Дејан Драгијевиќ, Далибор Драгијевиќ, кој во полиција раскажал како му помогнал на својот брат да го сокрие телото на девојчето. Тој требаше да биде сослушан во обвинителството на 7 април, но утрото почина во полициски притвор. Од слобода е лишен и таткото на Драгијевиќ, кој од самиот почеток се бранеше со молчење.
На самиот крај од рокот за поднесување обвинителен акт и пред да дојде моментот кога Драгијевиќ и Јанковиќ требаше да бидат ослободени, беше покренато обвинение за убиството на Данка Илиќ, во кое покрај Дејан Драгијевиќ и Срѓан Јанковиќ беше и Радослав Драгијевиќ. Обвинението е подигнато шест месеци по исчезнувањето на Данка, на 29 септември минатата година.
Обвинетиот Дејан Драгијевиќ три пати го менувал исказот, а Срѓан Јанковиќ бил испрашуван четири пати.
Обвинението вторпат беше потврдено во февруари годинава, а се уште не се знае како е дополнето. Исто така, се уште не се објавени информации за одлуките во врска со жалбите за потврдување на обвинението, а не се знае дали и кога ќе започне судењето.
