Македонски
Барселона го откажа пријателскиот натпревар против мароканскиот клуб Итихад Риади Тангер, кој требаше да се одигра на 15 август во Тангер, во рамки на подготовките за новата сезона.
Каталонскиот клуб соопшти дека, поради „моменталната неизвесност и околности“, смета дека одигрувањето на натпреварот би било несоодветно.
Иако Барселона не ја наведе конкретната причина, одлуката доаѓа во период на сериозна мигрантска криза и зголемени тензии поврзани со Сеута – шпанската енклава на северниот брег на Африка, која граничи со Мароко. Според извештаите, десетици илјади мигранти неодамна влегле во Сеута од мароканска страна, што предизвика сериозна политичка и дипломатска реакција.
Ситуацијата веќе има последици и во рамки на Европската Унија. Италија воведе привремени гранични контроли за патниците кои пристигнуваат од Шпанија, образложувајќи ја мерката со безбедносните и миграциските ризици. Шпанија остро реагираше на одлуката.
За Барселона ова е втор откажан натпревар во текот на летната подготовка, но не станува збор за дуелот со Бирмингем Сити. Натпреварот со англискиот клуб се одигра на 31 јули и заврши 2:2, по што Барселона загуби на пенали.
Откажан беше пријателскиот натпревар со Престон Норт Енд, кој требаше да се одигра зад затворени врати во Англија. Причината за неговото откажување беше неможноста на Престон да состави доволно силен прв тим.
По откажувањето на дуелот во Тангер, Барселона денеска продолжува со подготовките во Италија, каде што ќе настапи на турнирот „Friuli Venezia Giulia Cup“ во Удине заедно со Нотингем Форест и Удинезе.
Потоа, на 19 август, Барселона ќе го пречека египетскиот Ал Ахли на „Камп Ноу“ во рамки на „Џоан Гампер“ трофејот, а сезоната во Ла Лига за каталонскиот тим ќе започне на 23 август со гостување кај Елче.
