Македонски
Првото издание на фестивалот за електронска музика „Кора“ ќе се одржи на 18 и 19 септември во Кучково, на околу 30 минути од Скопје. Организатор на дводневниот настан е екипата зад скопскиот клуб „Минус Еден“.
На фестивалот, кој ќе се одржува под отворено небо, ќе настапат околу 30 локални, регионални и интернационални артисти. Организаторите го најавуваат „Кора“ како отворен простор за современата електронска сцена, без строги жанровски ограничувања и со фокус на внимателно избрана програма и квалитетен звук.
Програмата ќе опфати сурово и хипнотичко техно, електро, необични синт-линии, прекршени ритми, експериментални форми и слоевити музички текстури.
Меѓу интернационалните артисти што ќе настапат се Matrixxman, Legowelt, Object Blue, Interstellar Funk и Adriana Lopez. Регионалната сцена ќе ја претставуваат Невена Јеремиќ, Little Lu, Sev-Dah и UnDoo.
Во програмата се вклучени и домашните артисти Stojche Cvetanovski, Herzel Live, Андреј Мицајков, Душко Јаневски, Васо, Nashasya Kish, DJ Chvare, Diah, Бодан Јамакоски, L.O.V.D., Double G, Ivana Dragsiq, DJ UX, Daphunk, Iman Yam, Dejan Dex, Chrisot, Martina Peneva, Martin Vojdanovski, Tomi Bojadzi, Shef Shef и Egorius.
Фестивалот се реализира со поддршка од Општина Ѓорче Петров. Организаторите најавуваат два дена исполнети со музика, танцување и дружење во природното опкружување на Кучково.
