Македонски
Осмото издание на фестивалот за филм и музика „Ѕирни“ започнува вечерва во 19:30 часот на платото пред Домот на АРМ во Скопје. Настанот го организира „Кафе и филм Котур“, а првата фестивалска вечер носи три скопски премиери на домашни автори, проследени со меѓународна селекција на кратки филмови и музичка програма.
Филмскиот дел од првата вечер стартува во 19:45 часот. Публиката ќе ги види премиерите на кратките остварувања „Раѓање“ на Милена Витман (18 минути), „Клупа“ на Трифун Ситниковски (19 минути) и „Вошки“ на Розе Симоновска (12 минути).
На репертоарот се и три странски наслови: „Life After a Lifetime and Endless Rebirths“ на Леарт Рама, „Over the Threshold“ на Тара Гајовиќ и „No Skate!“ на Гуил Села. По секоја проекција се одржуваат разговори со присутните автори, што ќе ги водат Мартина Петреска и Ханис Багашов.
Фестивалот трае од 28 септември до 5 октомври на две локации: платото пред Домот на АРМ и просторот на „Кафе и филм Котур“. Музичкиот дел од првата вечер продолжува во „Котур“ од 21:00 часот, со сетот на Бојан Јанев (Soul Case).
Влезот за сите проекции и настани е слободен. Организаторите напоменуваат дека поради ограничениот капацитет на седишта, публиката мора однапред да подигне бесплатен билет од „Котур“.
Наградите во официјалната селекција ги оценува тричлено жири: Василис Терзопулос, главен селектор на меѓународната програма на грчкиот фестивал за краток филм „Драма“, актерката и режисерка Сара Климоска, како и Дарко Набаков, актер, историчар на уметност и извршен директор на „Македокс“.
За студентската програма одлучуваат актерката Тамара Ристоска, камерманот и ко-селектор на кратката програма на ИФФК „Браќа Манаки“, Атанас Велкоски, и режисерот Игор Христов.
