Македонски
Тројца истакнати кинематографери Жан Мари Дружу, Жулиет Ван Дормаел и Томасо Фиорили, на мастеркласот „Снимање во магичниот час“ во Кино Манаки зборуваа за еден од најпредизвикувачките, но и најмагични моменти во снимањето – краткиот период кога природната светлина создава специфична атмосфера и визуелен изглед. Преку свои искуства и примери од филмови, тие ги споделија техниките, креативните одлуки и предизвиците при работењето со светлината во овој период од денот.
Фиорили пред присутните кинематографери и филмски професионалци објасни дека препознатливата топла светлина на зајдисонцето не е само естетски ефект, туку резултат на сложени природни процеси. Тој покажа како сончевата светлина се менува додека минува низ атмосферата и како, со приближувањето на сонцето кон хоризонтот, се менува и нејзината температура на бојата.
За Фиорили, сепак, „магичниот час“ не е само прашање на убаво природно светло, туку и на прецизен избор на моментот за снимање. Во тој краток временски прозорец, светлината постојано се менува не само во интензитетот, туку и во бојата и квалитетот, а тоа бара внимателно планирање од страна на кинематограферот.
Фиорили е француско-италијански кинематографер кој кариерата ја започнал во Италија во модната фотографија, а во 1992 година се преселил во Белгија, каде што студирал на IAD. По дипломирањето во 1996 година снимал кратки филмови како кинематографер. Во 2006 година го снимил својот прв долгометражен филм како директор на фотографија – Cages на Оливие Масе-Депас. Подоцна работел на повеќе филмови и телевизиски серии, меѓу кои The Attack, Baron Noir, The Insult и The Walking Dead: Daryl Dixon.
Жулиет Ван Дормаел имаше свој дел во презентацијата. Прикажа конкретни сцени од филм и зборуваше за снимањето во магичен час.
„Поентата беше во една од сцените да се добие сино светло, па затоа снимавме покрај прозорецот. На тој начин ја искористивме природната светлина за да го постигнеме посакуваниот изглед на сцената“, кажа таа.
