Македонски
Третиот документарен филм на Тамара Котевска, „Силјан“, денеска ќе има светска премиера вон конкуренција на Филмскиот фестивал во Венеција кој е во тек. По Венеција, филмот ќе има и севрноамериканска премиера во Торонто на 6 септември каде е во официјалната натпреварувачка програма.
Истовремено, Котевска на Венецискиот филмски маркет пред финансиери и дистрибутери ќе го претстави својот нов, четврти документарец „Мамутите кои избегаа од царството на Елрих хан“ снимен во Сибир.
Англискиот дистрибутерски гигант „Dogwoof“ од Лондон ги откупи светските права за интернационална продажба на „Сиљан“. „’Dogwoof’ е компанија позната по современи документарци со Оскар и BAFTA номинации, а ова е нивна втора соработка со Котевска по успехот со ‘Медена земја’.
Американската „UTA Independent Film Group“ ги обезбеди правата за Северна Америка, а на продукцискиот тим му се приклучи и „Concordia Studios“.
Оригиналната музика за „Сиљан“ ја потпишуваат Joe Wilson Davies и Hun Oukpark, композитори од студиото на Hans Zimmer.
„Сиљан“ е вистинска приказна со бајковиден пристап инспириран од македонски фолклор од 17 век. Филмот ја следи врската меѓу еден земјоделец – Никола, кој по земјоделската криза останува сам, и бел штрк со повредено крило што го наоѓа на депонија. Од тој момент започнува реална бајка, огледало за човечките судбини и насоката по која се движи општеството.
„Во најзаборавените, но најбогати и живописни предели успеав да најдам приказна што е совршено огледало меѓу животите на белите штркови и човештвото воопшто“, објаснува Котевска.
Филмот е копродукција на „Ciconia Film“, „Concordia Studios“, „The Cornershop“ и продуцентите Тамара Котевска, Jean Dakar, Јорданчо Петковски и Anna Hashmi. Монтажер е Мартин Иванов, студио за тонска обработка – „PROTA“, Колор корекција – „GHABHA Studios“, а консултанти за наратив: Верица Недеска, Трифун Ситниковски и Suz Courtiz.
