Објавени номинациите за филмските награди „Бафта“

Трилерот „Конклава“ и мјузиклот „Емилија Перез“ се водечки во номинациите за филмските награди на Британската академија за филмски и телевизиски уметности (Бафта), кои ќе бидат доделени на 16-ти февруари во Лондон.

„Конклава“ на германскиот режисер Едвард Бергер има 12 номинации, а веднаш зад неа е „Емилија Перез“ на Французинот Жак Аудиар со 11.

Филмот „Бруталист“, во кој Адриен Броди игра архитект кој го преживеал холокаустот, беше номиниран во девет категории.

Номинациите беа објавени во средата. Добитниците на Бафта често се показател за тоа кој ќе ја добие најпрестижната награда во светот на филмот – Оскар.

Оваа година фаворит е „Емилија Перез“, филм кој на почетокот на јануари освои четири Златни глобуси.

Оскарите обично се доделуваат две седмици подоцна на церемонија во Лос Анџелес. Но, шумските пожари сè уште беснеат во градот, поради што телевизиското објавување на номинациите досега беше двапати одложувано и ќе се одржи онлајн на 23 јануари.

Одложена е и церемонијата за доделување на наградите од изборот на критичарите, која требаше да се одржи во недела.