Македонски
Филип Стевановски, дел од бендот ДНК, кој го загуби животот во катастрофалниот пожар во дискотеката „Пулс“ во Кочани, ќе биде погребан денеска. Семејството извести дека посмртните останки на Филип од 09 до 11 часот ќе бидат изложени во црквата „Св. Богородица“ во Ново Село, а погребот ќе се изврши во 11:30 часот на штипските градски гробишта.
Сопругата на Филип, Ирена се огласи со емотивна објава со која се простува од својот сопруг.
-Среќо моја, Филип мој.
Њоњче мое, ме остави со најголема празнина која не се опишува. Ми остави најголем спомен кој ќе го чувам и ќе се борам како најголема лавица.
Знам дека ќе нѐ чуваш и ќе ни дадеш сила да продолжиме по овој пат кој ќе биде претежок за нас.
Твојата светлина беше преголема за овој тажен свет. Свети и сега како најсилна ѕвезда која ќе ја гледаме секогаш и ќе знаеме дека нѐ чуваш од небото!
Лора беше твоето сѐ , музиката твојот живот, а јас твоето њоњче и ветерот во грб за да достигнеш сѐ што имаше замислено.
Последниот наш настап беше толку радосен и толку многу се смеевме, правеше сѐ за да сите бидеме среќни и насмеани.
Вечно ќе те паметиме по твојата голема душа, твојата насмевка што Лоричка ја носи, а јас во таа насмевка ќе те гледам тебе, мил мој.
Мојот живот без тебе веќе е тажен, претажен, но сѐ што сме сакале Лора да успее ветувам дека ќе го направам, а знам дека ти ќе ми помогнеш од зад облаците!
Летај, свири и дојди ни понекогаш во сон да се прегрнеме најсилно како што ти знаеше да прегрнеш, пишува Ирена.
