Македонски
В понеделник (6 октомври) во 19 часот во Градската библиотека „Браќа Миладиновци“ ќе се одржи разговор со писателката Румена Бужаровска. Нејзиниот роман „Тони“е книга на месецот и заедно со разговорот и клубот на читатели се дел 4. циклус на големата кампања на ГБСК „Читаме современи македонски автори“.
Разговорот со Бужаровска ќе го води Александра Јуруковска, а фрагменти од делото ќе чита актерот Андреј Серафимовски.
Напишан на жив, остар и современ јазик, во препознатливиот горчлив и истовремено духовит стил на Бужаровска, „Тони“ е роман за машкоста, за градот и за традицијата. Брутално комичен, но и длабоко трагичен, се чита во еден здив. Ова е роман што ќе ве удри од земја и ќе ве натера да ги преиспитате општествените, романтичните и семејните односи од нашето секојдневие. Книгата е во издание на Издавачки центар ТРИ.
Румена Бужаровска (1981, Скопје) е писателка, преведувачка и професорка. Авторка е на романот Тони (2024) и четири збирки раскази преведени на повеќе од петнаесет јазици. Расказите од збирките Мојот маж и Не одам никаде добиле мноштво меѓународни признанија и рецензии и се поставени како шест театарски претстави во земјата и во странство. Бужаровска е авторка на Господ, па Америка (2024), збирка есеи, како и студија за хуморот во расказот За смешното (2012). Како книжевна преведувачка од англиски на македонски, превела дела од Џ.М. Куци, Луис Карол, Труман Капоти и Фланери О‘Конор. Ко-авторка и ко-организаторка е на инцијативата за раскажување женски приказни ПичПрич, а е една од трите авторки на феминистичкиот поткаст Радио Милева. Пишува колумни за регионалниот магазин Велике Приче и предава американска книжевност и преведување на Филолошкиот факултет во Скопје.
