11 години по исчезнувањето почна нова потрага по авионот на „Малезија ерлајнс“

Потрагата по авионот на „Малезија ерлајнс“, кој исчезна со 239 луѓе во 2014 година, продолжи по речиси 11 години.

Патничкиот авион исчезна на несреќниот лет MH370 на 8 март 2014 година додека летал од главниот град на Малезија, Куала Лумпур, за Пекинг.

Исчезнувањето на Boeing 777 без трага претставува една од најголемите мистерии во историјата на авијацијата.

Денес, 11 години подоцна, компанијата Ocean Infinity почна нова потрага во Индискиот Океан во близина на брегот на Перт.

Австралискиот медиум 9 News објави дека бродот „Armada 7806“ во текот на викендот пристигнал на дестинацијата за пребарување, која се наоѓа на речиси 1.500 километри од брегот на Перт.

Потрагата ќе опфати површина од 15.000 квадратни километри во следните 6 недели.

Малезискиот министер за транспорт, Ентони Лок, во декември минатата година потврди дека Ocean Infinity ќе почне потрага според договорот што го поврзува плаќањето исклучиво со пронаоѓање на остатоците од авионот.

Доколку ги пронајде остатоците, на компанијата ќе ѝ бидат исплатени 70 милиони долари, во спротивно нема да добие надомест за пребарувањето.