Македонски
Судот за државна безбедност во Јордан осуди тројца мажи на смрт со бесење за вооружениот напад од минатиот месец врз православна црква во провинцијата Карак, на југот на земјата, кога беа убиени девет, а повредени 25 лица.
Тројцата биле прогласени за виновни за терористички дејствија со смртни последици, поседување оружје и муниција со намера за извршување напад, како и за терористичко здружување и пропагирање идеи на терористичка група.
Пресудата може да биде обжалена пред Касациониот суд.
Нападот врз христијанската заедница се случил во селото Хамуд, кога вооружени лица влегле во дворот на православната црква „Свети Ѓорѓи“ и отвориле оган врз поворка на погреб. Според полицијата, по нападот тројцата осомничени биле уапсени во напуштена куќа во провинцијата Карак, каде што се забарикадирале.
Јорданскиот крал Абдула Втори, кој ги посети повредените во болницата во Карак, го осуди нападот и вети дека одговорните ќе бидат најстрого казнети.
Провинцијата Карак има околу 375 илјади жители и голема христијанска заедница. Христијаните сочинуваат околу три проценти од вкупно речиси 11 милиони жители на Јордан, од кои мнозинството се сунитски муслимани.
