Македонски
Девет региони во Грција се ставени под црвена тревога до 29 октомври поради влошување на временските услови и очекуваните обилни врнежи од дожд и бури. Одлуката ја донесе Генералниот секретаријат за цивилна заштита врз основа на предупредување од Националната метеоролошка служба и проценка од Комитетот за проценка на ризик, јави ЕРТ.
Предупредувањето ги опфаќа регионалните единици Евија, Фтиотида и Беотија во Централна Грција, Споради, Магнезија и Лариса во Тесалија, регионот Атика, Додеканските острови во Јужен Егеј и Северен Егеј.
За Атика и Северен Егеј, црвената тревога е прогласена како мерка на претпазливост.
Според Комитетот за проценка на ризик, денеска се очекуваат дожд и локални бури во источна и јужна Грција, особено во Евија, Магнезија и Северните Споради.
За утре се предвидува понатамошно влошување на времето, со поројни врнежи од дожд и бури во источна Тесалија, Северните Споради, источна Централна Грција, особено во Фтиотида и Беотија, како и во Евија и Скирос.
Вооружените сили, полицијата, крајбрежната стража и другите надлежни служби се исто така во состојба на готовност, додека регионите и општините се повикани да ја проверат својата подготвеност за реагирање.
Статусот „црвена тревога“ подразбира целосна мобилизација на Националниот механизам за цивилна заштита, ангажирање на потребните човечки ресурси и обезбедување соодветна опрема за реагирање на вонредни состојби и ублажување на последиците од катастрофите.
Цивилната заштита ги повика граѓаните да избегнуваат активности на отворено, особено во крајбрежните области за време на бури.
