Македонски
Организацијата за економска соработка и развој (ОЕЦД), форум за креирање политики на индустријализираните земји, ја зголеми својата прогноза за глобалната економија за оваа година, предвидувајќи раст од 2,9 отсто.
За еврозоната, ОЕЦД предвиде раст од еден отсто, што е исто така повисоко од претходната прогноза од јуни. Во Германија – најголемата европска економија – растот се проценува на 1,1 отсто, што е за 0,4 процентни поени повеќе од последната проценка.
Сепак, за следната година, ОЕЦД ја намали прогнозата за глобалната економија на три отсто, а за еврозоната на еден отсто.
И покрај негативните последици од конфликтот на Блискиот Исток, растот во првата половина од годината остана силен во многу земји, соопшти ОЕЦД. Големите резерви на нафта, снабдувањето од извори надвор од земјите од Заливот и државните мерки за поддршка го ублажија влијанието, се наведува во извештајот.
Сепак, изгледите во голема мера зависат од тоа дали ќе се најде трајно решение за конфликтот. Царините и ограничувањата на извозот претставуваат дополнителни неизвесности.
ОЕЦД истакна дека економските изгледи се соочуваат со голема неизвесност. Доколку пазарот на енергенси брзо се нормализира, тоа би го намалило инфлаторниот притисок и би ги поттикнало деловните активности. Меѓутоа, нови пореметувања би можеле да го забават растот.
Постојат и ризици поврзани со временските услови, како што е феноменот „Ел Нињо“, што може да предизвика потешкотии во снабдувањето и високи цени на храната. Покрај тоа, растот би можел да забави доколку инвестициите во вештачката интелигенција не дадат очекувани резултати, соопшти организацијата.
ОЕЦД, со седиште во Париз, ги обединува земјите посветени на демократијата и пазарната економија. Покрај големите економии како Германија, САД и Јапонија, членки се и економии во развој, како Мексико и Чиле. Вкупно 38 држави се членки на ОЕЦД.(МИА)
