Македонски
Магацин полн со различни медицински лекови. медикаменти, суплементи, како и машина за екстракција на масло се само дел од работите пронајдени во еден од денешните претреси во големата полициска акција која се спроведува низ Македонија.
Станува збор за полициска акција насочена кон сузбивање на криминална група инволвирана во криумчарење стоки и извршување на коруптивни кривични дела, а која се спроведува денеска од утринските часови под раководство на јавен обвинител од Основното јавно обвинителство за гонење на организиран криминал и корупција. Во акцијата постапува Одделот за сузбивање на организиран криминал при МВР.
Според неофицијалните информации на „Република“, акцијата се спроведува на подрачјето на Скопје – Чаир, Тетово и Гевгелија. Уапсени се 6 лица, а се трага по уште неколкумина. Меѓу нив, дознаваме, има и лица вработени во Царинската управа.
Акцијата се спроведува поради сомненија за криумчарење, повреда на права од индустриска сопственост, давање и примање поткуп и перење пари.
