Македонски
Ерата на „безусловно трансатлантско пријателство“ веројатно е завршена во догледна иднина, изјави синоќа германскиот канцелар Фридрих Мерц.
Зборувајќи на предизборен состанок на неговата Христијанско-демократска унија (ЦДУ), пред регионалните избори во Берлин во недела, Мерц рече дека Европа е сведок на „пресврт во политичкиот став од другата страна на Атлантикот“.
Односите меѓу Европа и САД се влошија по враќањето на американскиот претседател Доналд Трамп во Белата куќа на почетокот на 2025 година, со големи спорови околу иднината на Гренланд, воведувањето царини и финансирањето на НАТО.
Мерц го предизвика гневот на Трамп претходно оваа година кога рече дека Иран го „понижува“ Вашингтон во сегашниот конфликт.
Сепак, германскиот канцелар нагласи дека оваа промена во ставот на Вашингтон, исто така, создаде можност што Европа мора да ја искористи.
„Одамна е време да преземеме одговорност за себе“, рече Мерц, посочувајќи на зголемените трошоци за одбрана на неговата влада.
Мерц се осврна и на економското закрепнување на Германија.
„На пат сме да излеземе од кризата“, рече тој, нагласувајќи го очекуваниот економски раст од околу 1,3 проценти оваа година.
„Излеговме од оваа бездна на намалување или стагнација на економијата“, нагласи германскиот канцелар, инсистирајќи дека реформите се сè уште неопходни.(МИА)
