Македонски
До 13 часот, во Центарот за управување со кризи (ЦУК) се регистрирани вкупно 16 пожари на отворен простор. Од нив, девет се активни, четири се под контрола, а три се изгаснати.
Од активните пожари, во Општина Струга пожарот на потегот од селото Буринец, преку селата Локов и Селце, до селото Елевци, зафатил нискостеблеста шума. Во Општина Македонски Брод активни се два пожари. Едниот е во селото Белица, на местото викано Кајорец кон селото Брезница, кај репетиторот, каде гори нискостеблеста и мешана шума, додека вториот е шумски пожар во селото Бенче.
Во Општина Кичево активен е пожарот во селото Кнежино, на местото викано Црн Камен, каде гори нискостеблеста шума. Во Општина Тетово, во селото Гајре, пожарот зафатил ниска вегетација и ниска шума. Активен е и пожарот во селото Палатица во Општина Желино, каде гори отпад.
Во Општина Гостивар активни се два пожари. Во селото Печково гори ниска вегетација и нискостеблести растенија, додека во селото Падалиште е зафатена ниска вегетација. Во Општина Долнени активен е пожарот во селото Долгаец, каде гори ниска вегетација.
Под контрола се четири пожари. Во Општина Кичево, во селото Тајмиште, на местото викано Дарда, пожарот е на ниска вегетација. Во Општина Сарај, во селото Копаница, зафатени се нискостеблеста шума и ниска вегетација. Под контрола е и пожарот на градската депонија во Делчево, како и пожарот во Општина Чучер-Сандево, во селото Брест, на местото викано Рамно, каде гори мешана шума.
Изгаснати се три пожари. Во Општина Ново Село изгаснат е пожарот во селото Ситник, каде гореле паднати стебла и трупци. Во Општина Прилеп изгаснат е пожарот кај Новите гробишта, каде била зафатена ниска вегетација, а во Општина Крушево изгаснат е пожарот кај Градските гробишта, исто така на ниска вегетација.
