Македонски
На 11 мај 2026 година во Музејот на современата уметност во Скопје се одржа изложба на дела на четири тимови средношколци, создадени во рамките на проектот „Современици во историјата на уметноста: младински перспективи на уметноста и општеството“. Проектот беше раководен од кустосот-водич Бојана Јанева, во соработка со проф. Илина Јакимовска од Институтот за етнологија и антропологија при ПМФ.
Во проектот учествуваа ученици од гимназијата „Јосип Броз Тито“ во Скопје, под менторство на професорката Ангелина Дамјаноска-Наумоска, и од „Американ хај скул Скопје“, под менторство на Дита Старова Ќерими.
Изложбата беше завршница на речиси двомесечен процес, во кој учениците поминаа низ неколку фази: посета на изложбата „Истокот е сè уште можен“, избор на дело на кое ќе одговорат со свое авторско дело, истражување, изработка и финално поставување во музејски простор.
Иако темите во делата на современите уметници беа комплексни — од историјата на регионот, преку социјална неправда, до војни и насилство — учениците покажаа висока свест за улогата на уметноста како простор за размислување, критика и општествен коментар.
Нивните дела покажаа дека младите можат активно да ги читаат и толкуваат и локалните и глобалните прашања, но и да одговорат на нив со сопствен визуелен јазик и став.
Проектот истовремено им овозможи на средношколците да го доживеат музејот како динамична, отворена и креативна средина, во која младите не се само посетители, туку и активни учесници во создавањето културна содржина.
„Современици во историјата на уметноста: младински перспективи на уметноста и општеството“ е дел од Програмата за музејска едукација за 2026 година, поддржана од Министерството за култура.
