Македонски
СДСМ преку соопштение реагираше на, како што наведуваат, засилените напади и обиди за внатрешно рушење на партијата, кои, според нив, се интензивирале во период кога СДСМ јавно објавува информации за, како што ја нарекуваат, „тендер коалицијата ВМРО–ЗНАМ“. Од партијата тврдат дека паралелно со тие објави се засилиле хајките, црните кампањи и обидите за дестабилизација на СДСМ одвнатре.
Според соопштението, сите напади биле диригирани и координирани од еден центар, кој СДСМ го лоцира во ВМРО-ДПМНЕ, со поддршка на, како што наведуваат, „партиски кујни и медиумскиот октопод Алфа–Алта“. Од СДСМ посочуваат дека за нападите биле искористени поранешни функционери на партијата, конкретно Јован Деспотовски и Петре Шилегов, поставувајќи прашање зошто токму тие биле избрани за, како што наведуваат, „предавство и напад врз СДСМ“.
Во соопштението се наведува дека против Деспотовски е поднесена кривична пријава од Управата за финансиска полиција, со сомнение за злоупотреба на службената положба и овластување. Според СДСМ, тој е осомничен дека како директор на Дирекцијата за технолошки индустриски развојни зони во 2022 година, заедно со други службени лица, му овозможил на едно правно лице да прибави противправна имотна корист во износ што, како што тврдат, надминува 10 милиони евра, при што нагласуваат дека постапката сè уште е во тек.
СДСМ тврди дека по неуспешните, како што ги нарекуваат, првични обиди, Деспотовски ги продолжил нападите кон партијата, во директна координација со медиуми и портали кои, според нив, користат иста реторика и теми како ВМРО-ДПМНЕ. Истата забелешка, како што се наведува, важи и за настапите на Шилегов.
Во делот што се однесува на поранешниот градоначалник на Скопје, од СДСМ тврдат дека Основното јавно обвинителство во 2024 година побарало доставување податоци и оформило предмет поврзан со јавна набавка на Град Скопје од 2021 година, во периодот кога Шилегов ја извршувал градоначалничката функција. Според соопштението, предметот сè уште се наоѓа во истражна постапка.
Од СДСМ тврдат дека ВМРО-ДПМНЕ врши притисок и уцени преку кривични пријави и други постапки, со цел да предизвика внатрешни поделби во партијата. Во пораката до јавноста, СДСМ наведува дека обидите за рушење на партијата одвнатре нема да успеат и дека ќе продолжат, како што велат, борбата против криминалот и корупцијата.
„Нема неколку вакви обиди да нè поколебаат. Сите ќе одговараат“, се наведува во соопштението на СДСМ.
