Македонски
Минатата недела, во прекрасниот амбиент на хотел „Цар Самоил“ во Банско, се одржа деветтото издание на Гастромак – еден од најзначајните гастрономски настани во регионот. Настанот започна со пристигнувањето на етаблирани шефови од целиот Балкан и пошироко, кои заедно со македонски професионалци создадоа уште една незаборавна гастрономска авантура.
Во текот на неколку дена, паралелно со промоцијата на македонската гастрономска традиција, се одржаа и едукативни предавања во Младинскиот центар на Општина Струмица, наменети за ученици од угостителските училишта од целата држава. Годинешната програма вклучи предавања на врвни имиња од гастрономската сцена, како што се Стево Карапанџа од Хрватска, Изток Легат и Томаж Возељ од Словенија, Драгица Лукин и Жељко Невен Бремец од Хрватска, Дон Давид од Русија, Алан Пајен од Маурициус, Ѓорѓе Костиќ од Србија, Хамид Хаџиќ од Босна и Херцеговина, Доменико Маџи од Хрватска и Вук Митровиќ од Црна Гора. Темите што ги обработија беа внимателно избрани и опфатија широк спектар на знаења – од современи кулинарски техники, преку зачувување и модерна интерпретација на традицијата, до уметноста на презентација, комуникација со гости и угостителски менаџмент. Особено внимание привлече предавањето за концептот ВАКС, како и панел-дискусиите за еволуцијата на балканската кујна, спарување храна и вино, тајни за совршен барбикју, основи на хотелиерство и најчестите грешки на гастрономските натпревари.
Дел од содржината беа и специјализирани презентации за македонската кујна од Никола Мишковски и Зоран Мајновски, за традиционалните десерти од Зоран Андонов, за гастрономското значење на Летница од Ивана Ѓоргиева и Мите Петров, како и анализа на новите угостителски трендови во Струмица од Кирил Иванов. Уметноста на поставување маса беше претставена преку предавање на Младен Мицевски.
Кулминација на деветтото издание на Гастромак беше гала-вечерата „Залче од светските вкусови“, што се одржа во хотел „Цар Самоил“. На оваа вечер, секој од шефовите подготви по едно автентично јадење од својата земја, претставувајќи ја културната и гастрономската разноликост преку вкус и приказна. Вечерата претставуваше вистинско патување низ светските кујни и беше симбол на заедништво, страст и професионализам во гастрономијата.
