Македонски
Дури и пред пандемијата, според некои податоци, се проценува дека околу 10 милиони Американци над 50-годишна возраст имале остеопороза, болест во која губењето на коскената маса може да го зголеми ризикот од скршеници.
Дополнителни 43 милиони луѓе во САД, вклучително и 16 милиони мажи, имале ниска коскена маса (остеопенија), што ги става на зголемен ризик за остеопороза.
Добиените фрактури можат да бидат сериозни, па дури и фатални – истражувањата покажуваат дека тие се одговорни за повеќе хоспитализирања отколку рак на дојка, срцев удар или мозочен удар кај жени над 55 години.
„Дојдовме до глобална криза кога станува збор за претпазливост за остеопорозата“, вели Е. Мајкл Левиецки, директор на New Mexico Clinical Research & Osteoporosis Center во Албакерки.
За да ви помогнеме да ги зачувате вашите коски во најдобра можна форма, еве каков начин на живот би било добро да водите.
Жените имаат двојно поголем ризик
Според Националната фондација за остеопороза, жените имаат двојно поголема веројатност да скршат коска поради остеопороза отколку мажите. Така, жените на возраст од 65 и повеќе години треба да одат редовно на основен медицински преглед, според нацрт-препораката од Работната група за превентивни здрацвствени услуги на САД.
Но, помладите жени со фактори на ризик за остеопороза, исто така, треба да бидат прегледани, вели Андреа Сингер, директор за коскена дензитометрија во Универзитетската болница MedStar Georgetown во Вашингтон.
Факторите на ризик може да вклучуваат историја на пушење, употреба на стероиди, автоимуни нарушувања како што се ревматоиден артритис, одредени типови на фрактури во минатото, хронична тешка конзумација на алкохол и дијабетес, болест на тироидната жлезда или рана менопауза. Оваа болест може да има сериозни последици и кај мажите, кај кои скршениците обично се случуваат околу 10 години подоцна отколку кај жените.
Исхрана за посилни коски
Додека некои студии сугерираат дека вишокот килограми може да ги заштити коските, некои други истражувања открија дека промената на тежината, зголемувањето или губењето, може да го зголеми ризикот од скршеници.
Сепак, исхраната која обезбедува силни коски исто така ви помага да одржите нормална тежина. Студијата објавена во American Journal of Clinical Nutrition 2018 година покажа дека исхраната богата со јаткасти плодови, цели зрна, маслиново масло и риба ја зголемува густината на коските кај луѓето со остеопороза повеќе од 12 месеци.
Таквата исхрана помага да се контролира воспалението, кое може да има заштитен ефект врз коските, вели Левиецки. Важно е да се внесуваат доволно количества магнезиум и калиум, кои се поврзани со подобра густина на коските кај постарите лица.
Калциумот е исто така важен, кој помага во градењето и зачувувањето на коските. Жените помлади од 50 години и мажи помлади од 70 години треба да земаат најмалку 1000 mg калциум дневно, а жените над 50 години и мажи над 70 години треба да земаат 1200 mg на ден.
Идеално, вашиот калциум треба да доаѓа од храната, вели Стивен Хониг, директор на Центарот за остеопороза во NYU Langone Health во Њујорк. Витаминот Д е важен бидејќи му помага на телото да го апсорбира калциумот. Збогатените млечни производи и житарки содржат витамин Д. А вашата кожа го создава како одговор на сончевата светлина.
Обрнете внимание и на протеините
„Студиите покажаа дека несоодветните количини на протеини се поврзани со зголемен ризик од скршеници, што има смисла бидејќи тие сочинуваат голем дел од вашите коски“, вели Левиецки.
На мажите постари од 50 години им требаат 56 грама дневно; на жените над 50 години – 46 грама. Ако сте вегетаријанец, погрижете се да јадете доволно растителни протеини, како што се мешунките и јаткастите плодови.
Ограничете го алкохолот и кофеинот бидејќи повисоките количини од овие состојки се поврзани со губење на коскената маса. Националниот институт за артритис и мускулно-скелетни и кожни болести не препорачува повеќе од еден алкохолен пијалок дневно за жени и два за мажи, како и помалку од три шолји кафе дневно за сите.
Вежбајте
Физичката активност може да ви помогне да ја одржите густината на коските, дури и по менопаузата, кога густината обично паѓа. Движењето со тегови како одење и тренинг со отпор се идеални.
