Македонски
Денеска од печат официјално излезе осмата поштенска марка посветена на децата со Спинална мускулна атрофија (СМА), соопштија од Здружението „Ретко е да си редок“.
Македонската поштенска историја испиша уште една златна страница. Од печат официјално излезе осмата поштенска марка посветена на децата со Спинална мускулна атрофија (СМА). Ова не е само филателистички успех, туку симбол на една долгогодишна, нескршлива борба за живот и гласно препознавање на реткоста, велат од Здружението.
Свечената промоција на поштенската марка ќе ја одржи здружението „СТОП СМА Македонија“ во сабота (28 февруари) во EU House (ЕУ Куќа) во Скопје, со почеток во 16:30 часот.
Македонија, преку овој проект, веќе осум години по ред во месецот на ретките болести, го потврдува својот статус како прва и единствена земја во светот која преку поштенските марки ја пренесува пораката на овие храбри дечиња.
Иницијативата е на Гордана Лолеска, која како вработена во АД „Пошта на Македонија“ и претседател на здружението „Ретко е да си редок“ од Охрид, својата професија ја претвори во најсилна алатка за општествена одговорност. Нејзиниот личен придонес за заедницата со СМА е доказ дека љубовта и упорноста можат да го обиколат светот на едно мало парче хартија.
Секоја марка што ја издаваме е ветување дека овие деца нема да бидат заборавени. Како вработена во Пошта, гордa сум што мојот професионален дом стана засолниште на хуманоста. Овие 8 марки се нашиот заеднички крик дека ‘Ретко е да си редок’, но токму во таа реткост лежи најголемата сила. Македонија денес повторно е пример за целиот свет, вели Лолеска.
