Македонски
Европската Унија со години разгледува можност за укинување на поместувањето на часовникот двапати годишно, но одлука сè уште нема. Така и годинава, во последната недела од октомври, милиони Европејци повторно ќе ги вратат стрелките еден час наназад.
Идејата за прекин на сезонското поместување на часовникот не е нова. Европската комисија уште во 2018 година предложи да престане промената на времето двапати годишно, при што секоја земја членка би избрала кое стандардно време ќе го задржи.
Предлогот следеше по јавна консултација во која учествувале околу 4,6 милиони граѓани, од кои 84 отсто се изјасниле за прекин на сезонското поместување.
Европскиот парламент во март 2019 година ја усвои својата позиција и поддржа прекин на поместувањето на часовникот. Сепак, за промената да стане закон, потребен е договор и со Советот на ЕУ, а токму таму постапката со години не е завршена.
Што го кочи укинувањето?
Еден од главните проблеми е прашањето кое време би го избрала секоја држава доколку престане сезонското поместување – сегашното зимско или летното време.
Европските институции стравуваат дека различни одлуки меѓу соседни земји би можеле да создадат проблеми за транспортот, прекуграничната економија и функционирањето на единствениот пазар. Затоа е потребна координирана одлука меѓу земјите членки.
Во октомври 2025 година Европскиот парламент повторно расправаше за прекинот на сезонското поместување. По тие дискусии, Европската комисија одлучи да направи дополнителна анализа која треба да помогне во идното носење одлука.
Засега – часовникот останува по старо
И покрај сите досегашни иницијативи, сезонското поместување на часовникот останува во сила.
Европската комисија во март 2026 година дури го објави официјалниот распоред за летното сметање на времето за периодот 2027–2031 година. Тоа значи дека, додека не биде донесена нова одлука, системот продолжува да функционира. За 2027 година промените се предвидени за 28 март и 31 октомври.
Засега, значи, нема одлука со која Европа ќе престане да го менува часовникот. И по повеќе од седум години од првиот предлог, прашањето останува отворено – дали Европа треба трајно да го задржи летното или зимското време, или сегашниот систем сепак ќе продолжи.
