Македонски
Само пет дена по преземањето на функцијата, Кејти Закарија повеќе не е портпаролка на Белата куќа. Нејзиниот краток мандат беше проследен со критики за првиот настап пред новинарите и прашања поврзани со нејзините професионални квалификации.
Според „Њујорк тајмс“, како што пренесува американскиот медиум „Д врап“, Закарија е разрешена откако американскиот претседател Доналд Трамп претходно јавно ѝ порача да размисли дали сака да продолжи да ја извршува функцијата.
Закарија ја презеде работната позиција во понеделникот, на 12 октомври, а веќе следниот ден го одржа својот прв брифинг со новинарите. Настапот траеше околу 14 минути, при што прашања поставија само тројца новинари. Асошиејтед прес забележа дека таа често се потпирала на подготвен текст и направила неколку говорни грешки.
Дополнителни критики се појавија поради нејзиното правничко образование и квалификации. При нејзиното именување, Трамп ја претстави како адвокатка, но Закарија во четвртокот призна дека не го положила правосудниот испит за прием во адвокатурата и дека не се обидела повторно да го полага. Според „Ројтерс“, таа дипломирала право на Универзитетот „Пепердајн“ во 2011 година.
Во интервју за „Фокс њуз“, Закарија го бранеше својот прв брифинг, наведувајќи дека имала ограничено време за подготовка. Таа објасни дека краткото обраќање било планирано, бидејќи Трамп подоцна требало лично да одговара на прашањата на новинарите.
Трамп во меѓувреме јавно ја коментираше ситуацијата, велејќи дека ја советувал Закарија повторно да размисли за својата позиција. Тој оцени дека медиумите се однесувале неправедно кон неа, а во моментот на изјавата најави дека конечната одлука ќе ја донесе подоцна.
Набргу потоа, „Д врап“, повикувајќи се на „Њујорк тајмс“, објави дека Закарија е отпуштена. Белата куќа засега не одговорила на барањето за коментар.
Пред да биде назначена за портпаролка, Закарија работела како конзервативна телевизиска коментаторка, била вработена во американското Министерство за домашна безбедност и имала советничка улога во областа на комуникациите во медиумската компанија на Трамп.
Таа ја наследи Каролин Левит, која ја напушти функцијата во август.
