Македонски
Украина официјално побара од Ватикан да ја формализира својата улога како посредник во напорите за враќање на украинските деца и цивили земени во Русија за време на војната, изјави денеска украински владин претставник.
Володимир Зеленски го упати барањето во писмо до папата Лав Четиринаесетти пред денешниот состанок меѓу папата и делегацијата на вратени украински деца и цивили, соопшти претседателскиот кабинет.
Киев бара Светата столица да му додели официјален статус на процесот инициран од папата Франциск, во кој италијанскиот кардинал Матео Зупи дејствува како папски пратеник за хуманитарни прашања. Украина вели дека формализацијата ќе обезбеди „соодветна комуникација“ со Москва и ќе ја обврзе Русија да одговори на украинските барања за бараните цивили.
-За да постигнеме повеќе, треба да го формализираме овој процес во Ватикан, изјави за новинарите во Рим Ирина Верешчук, заменик-шеф на претседателскиот кабинет. Таа истакна дека Русија во моментов ја користи „сивата зона“ избегнувајќи давање информации за украинските листи.
Украина очекува дека откако ќе се формализира, механизмот ќе стане одржлив канал за медијација меѓу двете земји.
Ватикан и руската амбасада во Светата Столица официјално не го коментираа барањето.
Според платформата „Вратете ги децата“, 19.546 украински деца се регистрирани како депортирани или присилно префрлени во Русија. Податоците што ги цитира украинскиот омбудсман Дмитро Љубинец покажуваат дека од 27 март, 1.247 деца се вратени преку дипломатски и хуманитарни канали.
Меѓународниот кривичен суд издаде налог за апсење на рускиот претседател Владимир Путин во 2023 година за наводни воени злосторства поврзани со киднапирање на украински деца на руска територија.
